Opendata Corsica : principii è mutivazioni



Opendata Corsica : principii è mutivazioni
Sì u riimpiegu di i dati hè un dirittu chì s’imponi à l’attori publichi, l’andatura OPENDATA in Corsica (chjamata OPENDATA CORSICA) hè una dimarchja vuluntarista da a Cullittività Tarrituriali di Corsica chì inveci di pata reguli  imposti, voli ammaistrà, pruvà, di modu à piddà i dicisioni boni è da adattà l’avvicinera à u cuntestu isulanu.
I mutivazioni di una dinamica OPENDATA in Corsica si sbucinani  in giru à principii fundivi di una dimarchja d’apartura di i dati publichi :

Chjarezza : assicurà una chjarezza middurata di l’azzioni publica è rinfurzà a cunfidanza di u citatinu in i so istituzioni.
Participazioni : guarantiscia a participazioni citatina è di una quantità maiò d’attori à l’azzioni publica par via di a criazioni di sirvizii è d’appiigazioni numerichi da favurizà cusì l’emergenza di punti di vista novi, di un impegnu citatinu crisciutu.
 • Cullaburazioni : fà cullaburà l’attori di un tarritoriu in giru à u valurizà di i dati isciuti da l’azzioni publica è favurizà a criazioni di un chjirchju virtuosu trà u citatinu, a so amministrazioni è i so eletti.
Inclusioni : offra sirvizii isciuti da i dati publichi à prò di l’intigrazioni è l’inclusioni di a maiurità.
Interuparabilità : parmetta l’interuparabilità di i cuntinuti è di l’infurmazioni isciuti da istituzioni publichi sfarenti di Corsica.
Innuvazioni : favurizà l’innuvazioni par via di a trasversalità è di l’accatastera d’infurmazioni. L’apartura di i dati hà da pirmetta à i prufiziunali, à i benevuli di crià raprisintazioni novi di l’infurmazioni, cunniscenzi novi, usi novi.
Efficenza : i dati publichi sò valurizati tandu aldilà di l’usu internu da l’istituzioni publichi. L’apartura accrescia cusì u putinziali di dati pubiichi aldilà di u so usu tradiziunali.
Ecunumia : sviluppà un mudelu icunomicu da cunfurtà a filera TIC isulana par via di a criazioni di valori ingiru à i dati publichi missi ammaniti.  

Scioglia l’imaginazioni di l’attori icunomichi è suciali di l’isula

Hè di primura pà l’OPENDATA CORSICA chì i dati da a CTC, i so agenzi è uffizii cum’è da l’altri istituzioni publichi di Corsica, sighini valurizati è ch’eddi possini custituiscia un patrimoniu immatiriali par a sucità isulana sana :

• i circatori insignanti ci pudariani truvà un fondu par studii è provi,
• i sviluppatori infurmatichi ani da pudè crià sirvizii novi aduprendu sti dati,
• citatini è ghjurnalisti ci truvarani infurmazioni utuli à l’analisi soia,
• l’mpresi pudarani offra un valori aghjustu à sti dati criendu impiegu è ricchezza in Corsica..

L’andatura OPENDATA CORSICA tocca dunqua à un prucessu d’innuvazioni aparta : si tratta di scioglia l’imaginazioni di l’attori icunomichi è suciali di l’isula da crià sirvizii novi, cunniscenzi novi, intarpritazioni  novi.